Qendra e Resurseve për Studentët e Komuniteteve Rom, Ashkalinj dhe Egjiptianë
Në një ceremoni solemne, sot u hap Qendra e Resurseve për Studentët e Komuniteteve Rom, Ashkalinj dhe Egjiptianë, një hapësirë inovative e dedikuar për mbështetjen akademike dhe sociale të studentëve. Qendra ofron një gamë të gjerë shërbimesh dhe burimesh, duke përfshirë bibliotekë, kompjuterë, printer, hapësira pune dhe një zonë relaksi. E hapur çdo ditë nga ora 08:00 deri në 16:00 (me mundësi deri në 18:00), kjo qendër synon të krijojë një ambient frymëzues dhe të favorshëm për zhvillimin akademik dhe social të studentëve, duke forcuar gjithashtu ndjenjën e përkatësisë komunitare.
Në kuadër të këtij aktiviteti, u lançua edhe faza e dytë e programit “Mbështetje Plotësuese për Studime Akademike për Studentët e Komuniteteve Rom, Ashkali dhe Egjiptian”, i cili synon të sigurojë mbështetje akademike për studentët e komuniteteve ashkali, rom dhe egjiptian, me qëllim të rritjes së pjesëmarrjes së tyre në arsimin universitar, përmirësimit të shkallës së vijimit, performancës, përfaqësimit dhe të diplomimit të studentëve të këtyre komuniteteve.
Ngjarja u nderua me praninë e Zëvendëskryeministres së Kosovës, znj. Emilija Redžepi, Ministres së Arsimit, Shkencës, Teknologjisë dhe Inovacionit, znj. Arbërie Nagavci, znj. Beate Elsaesser nga Zyra Zvicerane për Bashkëpunim në Kosovë, deputetë, donatorë, përfaqësues të institucioneve të arsimit të lartë dhe studentë. Në fjalët e tyre, të pranishmit theksuan rëndësinë e kësaj nisme për krijimin e mundësive të barabarta dhe përmirësimin e qasjes së studentëve në arsim dhe zhvillim profesional.
Në kuadër të aktivitetit, u nënshkruan marrëveshjet e bashkëpunimit me 100 studentë përfitues të programit, duke përforcuar përkushtimin ndaj mbështetjes së tyre.
Programi “Mbështetje Plotësuese për Studime Akademike për Studentët e Komuniteteve Rom, Ashkali dhe Egjiptian” dhe hapja e Qendrës së Resurseve financohen nga Zyra Zvicerane për Bashkëpunim në Kosovë dhe HEKS-i nga Zvicra. Ky angazhim i përbashkët është një hap i rëndësishëm për promovimin e mundësive të barabarta dhe zhvillimin e studentëve të komuniteteve në arsim.
